Miklir snillingar eru þessir alþingismenn.

Þeir koma upp í pontu í röðum, berja sér á brjóst og tala um mikilvægi þess að bjarga heimilunum með einum eða öðrum hætti. Þetta sé algjör forgangsvinna og beri að koma með tillögur strax um hjálparleiðangur. 

Á sama tíma tala menn ( og konur ) á Alþingi um að fara verði í launastrúktúr ríkisstarfsmanna og skera niður laun þeirra.

Það er eins og ríkisstarfsmenn séu með allt sitt á þurru fjárhagslega, og heimili ríkisstarfsmanna séu undanþegin kreppunni.

Á það ber að líta að ríkið er langstærsti launagreiðandi á landinu  og það er ekki það sem þarf akkúrat núna að skerða laun þeirra aðeins til að auka á vandann.

Ég held að Ólöf Nordal, Steinunn Valdís Óskarsdóttir, Pétur H. Blöndal og fleiri ættu að líta fyrst í eigin barm og komast að raun um hver er raunverulega ábyrgur fyrir ástandinu og leiða þá til ábyrgðar áður en farið er að tala um launalækkanir og auknar byrgðar almennings í landinu.

Sennilega eru þessir miklu snillingar á Alþingi Íslendinga öruggir um sjálfa sig og eru nú þegar farnar að heyrast raddir um að laun þeirra séu ekki í samræmi við þá miklu ábyrgð sem ráðherrar og aðrir áhrifamenn í stjórnsýslunni hafa, s.b laun bankastjóra.

Ég legg til að byrjað verði að spara á hinu háa Alþingi og alþingismönnum verði fækkað úr 63 í 23 og ráðherrum úr 12 í 4. Við hinir Íslendingarnir höfum hreinlega ekki efni á að reka Alþingi með 63 mönnum sem ekkert gera þegar vel árar og ekkert annað en tóma vitleysu þegar illa árar.

Byrjum á Alþingi og förum niður skalann þaðan, þegar búið er að ganga frá því máli, ekki fyrr. 

Það fer að líða að því að bylting verði gerð.

Já, blóðuga byltingu ef fram fer sem horfir. Það á að ganga frá fyrirtækjunum endanlega dauðum með tilheyrandi atvinnuleysi og stórhækka skuldir heimilanna, sem voru þó nægar fyrir.

Hagfræði er greinilega léleg fræði. Mismunandi skoðanir hagfræðinga á því hvað skuli gera eru ekki beinlínis til þess gerðar, að maður verði einhvers nær. 

Það er þannig með mig að ég, eins og tugþúsundir annarra íslendinga, eru tæknilega gjaldþrota. Skuldir hækka með degi hverjum en verð fasteignar minnar er nánast núll. Ég er settur í þann mesta skuldaklafa ríkis sem þekkst hefur á vestrænu bóli til þessa. Skuldir á hvern mann er meiri en nokkurn tíma hefur nokkru sinni verið sett á eina þjóð. Nú er kominn sá tími að mér stendur alveg á sama hvort ríkisstjórnin gerir þetta eða hitt, ég vil fá að vita hver er ábyrgur fyrir þessu öllu, og ég vil NÖFN.

Það þarf að gera það sem þarf til að fá svör, enga linkind, svör STRAX. Ég gat ekki trúað því sem gerðist á blaðamannafundi Geirs H Haarde s.l föstudag þegar hann var spurður hvort ekki ætti að skipta um bankastjóra Seðlabankans og ráða mann á faglegum nótum. Svar hans var á þá leið að hann vissi ekki betur en að síðast hefði verið ráðið í bankastjórastöðu Seðlabankans á faglegum nótum, af honum sjálfum. Þvílíkur hroki. Hann getur sagt þetta við þjóð sem er í andlegum og fjárhagslegum hremmingum og horfir upp á að mistök, sem hann viðurkennir sjálfur að hafi verið gerð, kosti menn vinnu og sennilega megnið af sparnaði þess. Hvílíkur hroki. Faglegum nótum. Vinur hans til margra ára, formaður flokksins og Forsætisráðherra, heldur maðurinn að við séum asnar sem hægt er að leiða áfram með bundið fyrir augun? Ef ég vissi ekki betur þá héldi ég að maðurinn væri siðblindur, ég held þó ekki en það stappar nærri því. 

Við þurftum ekki að heyra þetta á þessum tíma. Við þurfum menn sem vita hvað þeir eru að gera en ekki menn sem vita ekkert í sinn haus og kosta þjóðina sennilega fátækt, atvinnuleysi og eignaupptöku í stórum stíl.

Ég vil fá að vita hver ber ábyrgð á þessu öllu og það strax svo hægt sé að setja aðra menn inná sem vita hvað gera eigi. Þessir svo kölluðu ráðamenn þjóðarinnar eiga að hafa vit á að gera ekkert sem skapað getur þær aðstæður að hér verði gripið til vopna. Það kraumar óánægjan og hækkun stýrivaxta um 6 % er ekki leiðin til að minnka óánægju. Ef menn passa sig ekki þá verður þetta niðurstaðan og vopnin tala. Menn eru hvort sem er dauðir, þökk sé "ráðamönnum". Engar skrokkverjur duga til ef þannig fer. 

Íslenska þjóðin er seint reitt til reiði en þegar það gerist, þá bið ég Guð að hjálpa okkur öllum. 

Stýrivextir hækkaðir um 6 prósentur

Það voru gerð hræðileg mistök og ég vil fá að vita hver gerði þau mistök.

 Það kom fram í fréttum Stöðvar tvö í kvöld brot úr viðtali við Björgólf Thor sem gert var við hann í Kompásþætti sem sýndur verður annað kvöld. Þar segir hann fullum fetum að hægt hefði verið að koma í veg fyrir fall Landsbankans og einstakt tilboð hefði borist um flýtingu á því ferli að Landsbankinn í Bretlandi hefði orðið breskur banki á fimm dögum með láni frá Seðlabanka Íslands upp á 200 milljónir punda.

Þetta var ekki samþykkt og Landsbankinn féll. Nú er það spurningin hvaða FÍFL komst að þeirri niðurstöðu að koma Landsbankanum EKKI til hjálpar vitandi að það gæti bjargað Landsbankanum og þar með komið í veg fyrir milliríkjadeilu og því að við verðum stimpluð sem hryðjuverkamenn um aldur og ævi. 

Það virtist á símtalinu sem Árni átti við Darling að hann vissi fullkomlega hvað myndi gerast í framhaldinu, og því spyr ég hver tók þá ákvörðun að aðstoða ekki Landsbankann og af hvaða hvötum ver það gert.

Davíð kom þessu öllu af stað með sinni alræmdu hefnigirni og tók Glitni svo hægt væri að hefna fyrir töpuð mál gegn Baugs feðgum á öðrum vettvangi.

Ég sem borgari þessa lands vil fá að vita hvað var gert svo hrikalega vitlaust og heimskt að börnin mín og tilvonandi barnabörn skuli þurfa að borga brúsann fyrir 6 milljarða dolla fum og ráðaleysi æðstu ráðamanna.

Ég hef verið yfirlýstur Sjálfstæðismaður og verið einn af trúnaðarmömmum flokksins en ef þetta reynist á grunni reyst þá mun ég ALDREI kjósa Sjálfstæðismenn aftur og hvet alla til að gera hið sama.  

Mér finnst að öll ríkisstjórnin ætti að segja af sér sem fyrst og þeir sem bera ábyrgðina af þessu fíaskói hætti í pólitík, komi sér af landi brott og skipti yfir í annað þjóðerni og láti ekki nokkurn mann vita að þeir komi frá landi sem þeir vegna heimsku, settu á hausinn.

Starfandi Utanríkisráðherra

segir í fréttum Vísis að ekki verði óskað eftir Loftrýmisgæslu Breta sem fara eiga fram í Desember n.k. Hann segir jafnframt að það muni misbjóða þjóðarstolti Íslendinga ef þeir kæmu hingað til að verja lofthelgi Íslands.

Ég tek hatt minn ofan fyrir Össuri að standa í lappirnar og ögra Bretum eftir að þeir gerðu okkur öll að hryðjuverkamönnum fyrir 10 dögum síðan. Getum við ekki fengið Norðmenn til að gæta Loftrýmis okkar þar sem þeir eru bæði okkur afar vinsamlegir í þrengingum okkar, og virðast taka upp málstað okkar á erlendri grund. 

Það er samt ófögur sagan af konunum tveimur sem fóru í sakleysi sínu inn í búð í Danmörku en heyrðust tala íslensku. Búðareigandinn kom þá til þeirra og bað þær að yfirgefa búðina þar sem hann vildi ekkert af Íslendingum vita og rak þær með hörðu út og kvaddi þær með orðinu "bless".

Ef þetta er almennt viðhorf Dana til okkar, þá ættum við að reyna að minnka öll okkar samskipti við þá, reka sendiherrann heim og slíta stjórnmálatengslum við þá eins og við ættum að gera við Breta.

Við eigum að hafa samskipti við þjóðir sem okkur eru hliðhollar og gera við þá viðskipta og varnarsamninga en slíta samskiptum við aðra. Þegar illa gengur þá vill koma í ljós hverjir eru vinir í raun og hverjir eru vinir aðeins þegar vel gengur.

Það skyldi þó aldrei verða að Rússar geymdu eins og tvær TU-160 og tíu SU-27 orrustuþotur að staðaldri á Keflavíkurflugvelli, þeir eru jú vinir okkar í dag. 

 

Krónan aldrei lægri.

Hvar enda þessi ósköp. Greiningardeild Glitnis (er Glitnir ekki farin á hausinn? ) spáir að allt verði komið í himnalag aftur um mitt ár 2010. Hvenær hefur greiningardeild Glitnis haft rétt fyrir sér sl. mánuði? ALDREI.

Ég held að þessir gæjar eigi að halda sínum kj... saman og vera ekki með neinar yfirlýsingar um komandi framtíð.

Það er viðbúið að heilmilin fái reikningin fyrir þessu brölti fjárglæframanna með orðspor íslands og eignir, eins og alltaf þarf hinn almenni borgari í þessu landi að borga og bera ábyrgðina. Þeir ganga út frá þessu þegar þeir fara af stað. 

Stjórnmálamennirnir hafa enga ábyrgð og hafa komið því svo við að það sem eftir var af orðsporinu er farið og það á greinilega ekkert að gera til að reyna að laga það aftur. 

Ég persónulega hef misst trúna á þá menn sem standa við stjórnvölinn eftir atburði s.l vikna og ég mun ekki styðja þá til endurkjörs hvenær sem til kosninga kann að koma.

Fyrrverandi forstjóri 365 Miðla var í Íslandi í dag fyrir nokkrum vikum síðan og kallaði hann Geir Haarde gufu. Ég hef ekki getað hrint þessari hugsun út úr höfðinu á mér og hef komist að því að hann sagði satt , Geir Haarde er gufa og mun ekkert gera til að jafna hlut okkar við Breta eða koma heimilunum til hjálpar á þessum örlagatímum. Hann er bara ekki maður til þess.

Það virðist vera að flokkarnir séu að nota tímann til að reyna að koma sínum mönnum að við kjötkatlana og sinna ekki þeim skyldum sínum að hjálpa þeim sem hafa misst allt og eru í fjármálakrísu NÚNA. Ef það kemur á daginn að svo sé þá verð ég fyrstur til að ganga í þá hreyfingu sem mun með góðu eða illu koma þessum mönnum frá svo hægt verði að gefa sanngjarnt upp á nýtt þannig að allir Íslendingar fái réttan sinn hlut.

Krónumarkaðir freðnir sem fyrr

Allt bankakerfið komið í hendur ríkisins

Skömmu eftir miðnætti 9. okt tók Fjármálaeftirlitið yfir rekstur Kaupþing banka og eru þá allir helstu viðskiptabankar landsins fyrir utan Sparisjóðina orðnir ríkisreknir.

Í Kastljósi gærkvöldsins lét bankastjóri Landsbankans, Sigurjón Árnason hafa eftir sér, að kapítalisminn í sinni mynd væri við það að falla. Þetta er auðvitað laukrétt hjá honum en enginn veit hvað við tekur. Einhverskonar sósíalismi verður sennilega ofaná og langt þangað til að traust myndist til að taka upp óhefta frjálshyggju, ef þá nokkurntíma aftur.

Sigurjón hvatti einnig til þess að nýta þær orkuauðlindir sem við eigum og leggja niður deilur um virkjunarkosti. Auðvitað eigum við að fara eftir þessu og nýta alla skynsamlega virkjunarkosti til að auka framleiðslu, auka atvinnu og tryggja innkomu gjaldeyris til lengri tíma. Við eigum að hraða uppbyggingu álvers við Helguvík og á Bakka en líta einnig í kringum okkur eftir öðrum tækifærum til framleiðslu og útflutnings.

Gagnaver er góður kostur að fá hingað þar sem við getum afhent "græna orku" til starfseminnar og þau geta verið staðsett næstum hvar sem er á landinu, ekki bara á Suðvesturhorninu heldur hvar sem er þar sem orka er næg og stöðug. Núna er tækifæri til að meta alla kosti til framleiðslu rafmagns til gagnavera.

Við verðum að snúa vörn í sókn strax, og byrja vinnu við ofangreint, helst í dag. Það er ekki eftir neinu að bíða og halda fram á vegin og líta ekki til baka fyrr en við erum komin út úr þessu bölvanlega ástandi sem nú ríkir.

Það er ögurstund í íslensku efnahagslífi

og brýnt að stjórnvöld haldi rétt á spilunum. Nú í þessari andrá var að koma tilkynning frá Seðlabankanum um að fastgengistefnu, sem viðhaldið hefur verið í 30 klukkustundir sé vonlaus og horfið sé frá henni. Heimilunum verði sendur reikningurinn eins og ekki sé komið nóg af skuldbindingum  forríkra einstaklinga sem hafa skuldsett þjóðina að þeim forspurðum.

Einhver verður að svara fyrir það að þjóðin skuli vera komin í þá stöðu sem hún er í núna. Skattahækkanir og verðbólga eru í farveginum og þeir sem komið hafa okkur í þessa stöðu hafa einungis borgað fjármagnstekjuskatt til  margra ára og engan tekjuskatt. 

Geir H. Haarde talaði um það fyrir tveim dögum eða svo, að gamlir vinir hefðu brugðist á ögurstundu og þess vegna hefði þurft að stofna til nýrra vináttu, samkvæmt fréttum, í austri. Rússar tóku vel í þá málaleitan að veita okkur lán til að bjargast fyrir horn, en Bandaríkjamenn hafi gefið okkur fingurinn. Rússar hafa reyndar reynst okkur vel í áranna rás og hafa haft við okkur vöruskipti þegar vörukaup frá útlöndum reyndust erfið fyrr á tímum.

Nú þegar hafa heyrst raddir um að staða okkar í NATO geti orðið erfið ef við gerum lánasamning við Rússa. Við því er ekkert að gera og kannski reynist það þrautalendingin að lokum að segja Ísland úr NATO, slíta varnarsamningi við BNA menn ( sem er hvort sem er ekki neitt neitt )  senda sendiherra BNA heim, kalla okkar sendiherra heim, og slíta stjórnmála og viðskiptatengslum við Bandaríkin. Í framhaldinu væri eðlilegast að gera varnar og viðskiptasamninga við Rússa og stórauka tengslin við þá sem reynast okkur vel.

Það gæti orðið saga til næsta bæjar ef af verður, að stofnríki NATO segði sig úr bandalaginu og gerði varnarsamning við Rússa og fréttir heimsbyggðarinnar snérust þá um eitthvað annað en verðfall á mörkuðum og bankakrísu.

Þeir sem hafa reynst okkur best við þessar erfiðu aðstæður eru Norðmenn sem hafa sýnt okkur vinar og bróðurhug og boðist til að hjálpa okkur í gegnum þennan ólgusjó og Svíar sem hafa einnig sent skilaboð um aðstoð ef þörf gerist.

Það kemur best í ljós hverjir eru raunverulegir vinir þegar kreppir að og við hverja er best að binda sitt trúss við í framtíðinni. Svo sannarlega er að koma í ljós að Bandaríkjamenn hafa notfært sér Íslendinga þegar þeim hentaði, en snúa baki í okkur þegar á reynir fyrir okkar þjóðfélag.